Balor P77.68M infra projects mapatuman

Kapin sa P77.68 milyones balor nga mga proyekto sa imprastraktura ang gipaabot mapatuman dinhi sa dakbayan sa Cagayan de Oro.

Kini human giuyonan sa konseho sa syudad sa sesyon niadtong Lunes nga gidumala ni bise mayor Kikang Uy ang Ordinance No. 13265-2017 nga nag-aprobar sa Supplemental Budget No. 1 sa General Fund sa tuig 2017 nga adunay gibanabanang gahin nga P77.68 milyones.

Lakip sa gipundohan mao pagtukod og tulo ka andanang City Jail Building Male Dormitory dinha sa barangay Lumbia balor P19.20 milyones, pagtukod sa Drug Rehabilitation Center (Phase II) balor P20 milyones, Infirmary Hospital sa District II balor P25 milyones ug P5.95 milyones nga road re-blocking and construction of Slope Protection Structure with Drainage dinha sa Bugo National High School.

Mapatuman usab pinaagi sa maong SB1 ang Salintubag Program human gigahin sa konseho ang igong kantidad isip paatbang pundo sa implementasyon sa Mambuaya Water System -PhII sa barangay Mambuaya balor P2.27 milyones, pagtukod sa FS Catanico Water System -PhII balor P1.86 milyones, Tuburan Water System -PhII balor P1.93 milyones ug pagpalapad sa Taglimao Water System -PhII balor P1.44 milyones.

Sa sesyon niadtong Lunes, si konsehal Ian Mark Nacaya mipasabot nga sa kasamtangan ihikling una ang pagpatuman sa proyekto sa redeveloment sa Kagay-an Tropical Spring Resort kansang pundo nasukip sa maong SB1 tungod kay gikinahanglan pa ang dugang makuting pagtuon niini.

Ang ordinansa diin nasukip ang SB1 gipaluyohan sa komite sa panalapi ni konsehal Edna Dahino ug komite sa pamalaod ni konsehal Nacaya.