ARON mas mapalambo ang paghatod sa tinud-anay nga serbisyo ngadto sa katawhan, hingpit nga gipadayag ni Konsehal Kenneth John Sacala ang iyang suporta sa planong pagtukod sa bag-ong City Hall diha sa Barangay Carmen, niining dakbayan.
Kini ang gipatin-aw ni Konsehal Sacala, chairman sa komite sa youth and sports development, atol sa regular session sa konseho niadtong Lunes nga gidumala ni Bise Mayor Jocelyn "Bebot" Rodriguez.
Sumala ni Sacala nga gumikan sa paspas nga pagsaka sa populasyon sa Cagayan de Oro, gikinahanglan na gayod nga palapdan ug pauswagon ang mga pasilidad sa kagamhanan aron hingpit nga maserbisyohan ang katawhan.
Kini nga pamahayag sa konsehal gipadayag agig suporta sa gipalabang nga resolusyon sa konseho nga naghatag og panugot kang City Mayor Rolando "Klarex" Uy nga makignegosasyon sa mga institusyon sa panalapi o mga banko aron makakuha og pundo pinaagi sa loan para ipalit sa yuta, gastohon sa pagtukod ug pagkompleto sa gisugyot nga Cagayan de Oro Government Complex sa Carmen.
Nagtuo si Konsehal Sacala nga kini nga lakang usa sa labing epektibong solusyon nga nakita sa kagamhanan aron mas mapalambo ug mapadali ang pagtunol serbisyo publiko ngadto sa matag Kagay-anon. (JRG/SP)
PABOR si Konsehal Roger Abaday, chairman sa komite sa public order and safety, sa paghatag katungod ni Mayor Rolando Klarex Uy nga makig-negosyar sa mga banko aron manghulam sa salapi nga maoy gamiton alang sa pagtukod sa bag-ong government complex sa syudad.
Kini ang gipaambit nga pamahayag ni Abaday atol sa sesyon niadtong Lunes nga gidumala ni Bise Mayor Bebot Rodriguez.
Sumala ni Konsehal Roger Abaday nga dugay na kini nga plano diin ang bugtong tuyo mao ang paghatag og maayong pag-serbisyo ngadto sa katawhan sa Dakbayan.
Gani ang kahimtang karon sa kasamtangang City Hall nakahasol sa katawhan tungod sa kakulangon sa parking lot diin ang mga kliyente magsigi pag tuyok para mangita og kaparkingan.
Unya kadtong adunay tuyo sa opisina sa RTA moadto pa sa Barangay Kauswagan alang sa ilang transaction, sumpay sa konsehal.
Siya midugang nga panahon nga mahatagan sa katumanan ang pagbaton og bag-ong City-Hall, kay gawas nga makatunol sa maayong serbisyo, mahiusa ra usab sa usa ka dapit ang tanang opisina sa goberno lokal.
Malaumon si Abaday nga masabtan sa katawhan nga ang tumong ug tinguha sa kasamtangang administrasyon mao lamang ang paghatag sa dugang kaayohan ug kalamboan sa dakbayan. (MLR/SP)
PADAYONG gitun-an sa hiniusang komite sa Trade ni Konsehal George Christopher Q. Goking, sa Climate Change ni Konsehal Paolo Nicolo Gaane, ug sa Environment ni Konsehal Enrico Salcedo ang gisugyot nga Cagayan de Oro Climate Resilience and Nature-based Solution (NBS) Investment Mechanism Ordinance.
Kini human giuyonan sa maong mga komite ang pagmugna og usa ka Technical Working Group (TWG) nga gitahasan sa pagtino sa maong balaodnon sa tuyo nga kini ma-align sa mga nasudnong balaod sama sa DENR guidelines, Climate Change Act of 2009, ug Local Government Code.
Gilangkoban ang maong TWG sa buhatan sa City Local Environment and Natural Resources Office (CLENRO), representante ni Congressman Jose Manuel Alba, ug Oro Trade and Investment Promotions Center (Oro-TIPC).
Ang maong mahinungdanong balaodnon gipangamahanan nila ni Bise Mayor Bebot Rodriguez ug Konsehal Jonjon Rodriguez.
Atol sa hiniusang tigom, si Bise Mayor Bebot Rodriguez mibutyag nga dako kaayo og importansya kini nga sugyot ordinansa alang sa mga Kagay-anon.
Tumong niini nga mapanalipdan ang siyudad batok sa kalamidad, sa pagbaha ug pagbag-o sa klima pinaagi sa natural nga mga pamaagi sama sa pagpanalipod sa CDO River basin, mangrove restoration, ug urban green spaces.
Ang maong lakang nagtumong sa pagtukod og market-based mechanism aron aghaton ang pribadong sektor sa pag-invest sa Nature-based Solutions (NBS) alang sa pagpanalipod sa Cagayan de Oro River Basin, sumpay sa bise mayor.
Mitambong sa maong tigom si Congressman Jose Manuel Alba aron ipakita ang iyang hugot nga suporta, diin iyang gihatagag importansya ang hiniusang responsibilidad sa rehiyon sa pagpanalipod sa kinaiyahan, ilabi na nga ang river basin nga nagsumpay sa Bukidnon ug Cagayan de Oro. (RNQ/SP)
