XU gipahalipayan sa 100% passing rate sa Nursing Board Examination

GIPAHALIPAYAN sa Konseho sa Dakbayan atol sa regular sesyon niadtong Lunes nga gidumala ni Bise Mayor Jocelyn "Bebot" Rodriguez ang Xavier University-Ateneo de Cagayan human niini makuha pag-usab ang 100% passing rate sa bag-ohay lang nga Philippine Nurses Licensure Examination (PNLE).

Subay sa report gikan sa Professional Regulation Commission (PRC), tanang 152 ka examinees gikan sa Batch Araya sa Xavier University ang nakapasar sa maong pasulit.

Gawas niini, ang unibersidad usab ang nag-inusarang tunghaan sa tibuok Mindanao nga nakakuha og perpektong passing rate nga adunay kapin sa 100 ka mga examinees.

Gipamatud-an na usab sa maong institusyon ang kalidad sa edukasyon sa panglawas human kini mailang Top 1 Performing School sa tibuok nasod. Nasakmit ni Ken Kyle V. Suizo ang Top 7 nationwide human makakuha sa grado nga 91.00%.

Kini nga kalamposan nagpabilin sa hingpit nga record sa Xavier Ateneo College of Nursing sulod sa ika-20 nga sunod-sunod nga higayon nga nakatala og walay sipyat nga passing rate.

Alayon niini, si Bise Mayor Bebot Rodriguez mibutyag nga ang maong dungog dili lang para sa tunghaan kon dili alang usab sa tibuok dakbayan sa Cagayan de Oro.

"Nagpamatuod kini nga ang siyudad nagpabiling sentro sa de-kalidad nga edukasyon ug nag-umol og mga world-class nga mga propesyonal sa natad sa medisina ug pag-atiman sa panglawas," matod pa ni Rodriguez.

Gidayeg usab sa bise mayor ang dedikasyon sa administrasyon sa maong tunghaan, mga magtutudlo, ug sa mga ginikanan nga nagpaluyo sa kalamposan sa mga bag-ong registered nurse. (RNQ/SP)