Salcedo: Bag-ong tukoron nga City Hall maghatag sa daghang kaayohan

DAKO ang pagtuo ni Konsehal Eric Salcedo, chairman sa komite sa public utilities, nga daghan ang maangkon nga kaayohan sa katawhan kon mabalhin ang City Hall sa Upper Carmen ning syudad sama sa pagka-minus sa dagan sa trapiko ug makadaginot usab sa kuryente kay solar man ang gamiton.

Kini ang gipaambit nga reaksyon ni Salcedo atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Salcedo nga gisabot niya ang pagpakabana sa mga sakop sa minoriya apan segun sa gihan-ay nga pagtuon sa mga hintungdan ahensya sa goberno nga adunay kapas ang syudad nga makabayad sa maong gilaraw nga loan labi pa kay matag tuig, gasaka ang kinitaan sa dakbayan.

Dugang pa niini, otsienta porsento (80%) sa katawhan sa Dakbayan ang uyon nga mabalhin na ang City Hall sa usa ka hamugaway nga dapit nga layo sa trapik ug mahiusa ang pag-proseso sa ilang mga gikinahanglan.

Nunot niini, malaumon si Konsehal Eric Salcedo nga mahatagan na sa katumanan ang dugay nang gidamgo sa katawhan alang sa maayong paghatag sa pag-serbisyo ngadto sa katawhan sa Dakbayan. (MLR/SP)