Xavier Estates H’owners Assn mipasalamat sa konseho pagtubag sa ilang hangyo

HUGOT nga gipasalamatan sa mga opisyal ug sakop sa Xavier Estates Homeowners Association ang konseho sa syudad ubos ni Bise Mayor Kikang Uy sa paghatag og solosyon sa ilang problema.

Kini human nasukip sa gisugyot nga Environment Code sa dakbayan ang exemption sa pagbayad sa tipping fees dinha sa paglabay sa basura sa sanitary landfill.

Mahinumduman nga midangop sa konseho pinaagi sa komite sa environment ni Konsehal Enrico Salcedo ang kapunungan human kini gipaninglan sa dakbayan sa bayad sa paglabay sa ilang basura dinha sa landfill.

Gipasabot nga ang ilang pagkolekta sa basura sulod sa subdivision nakatabang sa programa sa syudad sa solid waste management tungod kay dili naman ang nakakontratang IPM ang mokolekta kun dili ang ilang kaugalingong garbage collector.

Niini, gilatid ubos sa Section 4, Article IX sa gisugyot nga Environment Code nga ang tanang subdivision nga adunay kaugalingong accredited garbage collector dili na kinahanglang mobayad sa tipping fee alang sa ilang mga residual waste sa kondisyon nga kini nakuha sulod gayud sa subdivision ug ang subdivision o’ kapunungan mohatag sa trip ticket matag schedule sa koleksyon.

Niini, malaumon si Bise Mayor Kikang Uy nga kun mapasar ug maaprobahan ang Environment Code dako ang matabang niini dinha sa kampanya sa dakbayan pagproteher sa kinaiyahan.