top of page

SUPPLEMENTAL FEEDINGPROGRAM IPATUMAN SA CDO

HAYAN mapalapdan pa ang programa sa kagamhanan sa dakbayan dinha sa pag-amuma sa kabataan.


Kini human ang konseho sa syudad ubos ni bise mayor Kikang Uy sa sesyon kagahapon, mihatag og panugot ni mayor Oscar Moreno pagpirma sa Memorandum of Agreement (MoA) tali sa rehiyonal nga buhatan sa Department of Social Welfare and Development (DSWD-10) alang sa pagpatuman sa Food for School and Healthy Start Feeding Program subay sa Republic Act 11037 kon Masustansyang Pagkain para sa Batang Pilipino Act of 2018.


Si konsehal Girlie Balaba, chairman sa komite sa social services ug usa sa nagpaluyo sa gipalabang nga ordinansa alang sa maong katuyuan, mibutyag nga ubos sa MoA, ipatuman ang Supplemental Feeding Program (SFP) dinha sa mga day care centers ug susamang fasilidad sa dakbayan.

Niini, adunay igahin nga P15 matag bata matag adlaw alang sa pagkaon ug alternatibong pagkaon sa usa ka nagtungha sa day care.


Ang DSWD maoy mopalit sa gikinahanglang gamit sa programa samtang ang dakbayan maoy magtumbok sa mga benepisaryo pinaagi sa City Nutrition Office.

Ang programa gilantaw nga ipatuman sa umaabot tuig tingtungha 2021-2022 sulod sa 120 ka adlaw.


Sa iyang bahin, si bise mayor Kikang Uy malaumon nga ang padayong pagtambayayong sa lokal nga kagamhanan ug mga nasudnong ahensya sa gobyerno maghatag og kahigayonan sa kabataan nga mapalambo ang ilang makat-onan tungod kay mahatagan kini sa tukmang pagkaon nga gikinahanglan sa ilang lawas.


Ang ordinansa nga gipalabang sa konseho alang sa maong katuyuan gipaluyohan usab sa komite sa pamalaod ug reglamento ni konsehal Ian Mark Nacaya.

bottom of page