Suan uyon amendahan ang Chapter 109 sa Codified Ordinance

DAKONG uyon si Konsehal Aga Suan, minority floor leader, sa sugyot pag-amendar sa Chapter 109 sa Codified Ordinance nga may kalabotan sa Sale of Rugby.

Kini ang gibutyag sa konsehal atol sa hiniusang tigom sa komite sa public order and safety ni Konsehal Roger Abaday, komite sa barangay affairs ni Konsehal Marlo Tabac ug sa komite sa trade and commerce ni Konsehal Christopher George Goking diin gituki ang taho ni Konsehal Roger Abaday kabahin sa problema sa mga minors nga gasinlok sa rugby ug ang pagpamaligya niini ngadto sa minor de edad.

Atol sa maong tigom, giklaro sa representante sa Philippine Drug Enforcement Agency (PDEA) nga wala silay datus bahin sa minors nga naggamit og rugby solvent, toluene base o substances apan aduna silay gihimong educational drive sa mga tunghaan nga bawal ang maong matang nga substance ug gilimit sa pagbaligya sa tanang minor.

Giklaro usab sa PDEA nga walay balaod nga nagdili sa pagbaligya sa rugby solvent tungod kay dili man kini illegal substance ug ang problema kay ang mga hamtong maoy namaligya pinaagi sa binotelya sa maabot nga presyo ngadto sa mga kabataan.

Niini, dakong uyon si Konsehal Aga Suan nga maamendar ang maong balaod aron sa pag-regulate sa pagbaligya sa rugby. (RNQ/SP)