Seguridad ug pagpasayon sa negosyo gisaad sa CDO: Goking

GIDAPIT ni Konsehal George Christopher Goking, chairman sa komite sa trade and commerce sa Konseho, isip representante ni Mayor Rolando "Klarex" Uy, ang mga magpapatigayon sa pagbubu sa ilang puhonan ug negosyo dinhi sa syudad.

Ang maong panawagan gihimo sa konsehal atol sa 35th Mindanao Business Conference (MinBizCon) diha sa Atrium Limketkai Center.

Ang maong kalihokan gipasiugdahan sa Philippine Chamber of Commerce and Industry (PCCI), uban sa pakigtambayayong sa Cagayan de Oro Chamber of Commerce and Industry, Inc. (Oro Chamber) ug sa Mindanao Development Authority (MinDa) nga nagdala sa tema "Accelerating Inclusive Growth for Business Through Innovation and Sustainability: Bridging the Gap, Scaling the Future".

Sa iyang mensahe, gipadayag ni Goking nga andam ang lokal nga kagamhanan ubos sa administrasyon ni Mayor 'Klarex' Uy nga mahimong "gateway" o pultahan sa patigayon pinaagi sa pagpalig-on sa mga imprastraktura, pagpasayon sa pagproseso sa business permits, ug pag-abag sa mga public-private partnerships.

Magarbohon usab nga gibutyag ni Goking nga ang Cagayan de Oro giila na karon isip usa sa mga nag-unang sentro sa pag-uswag (Growth Centers) sa tibuok nasod.

Tungod kay dako ang kalambigitan sa seguridad ngadto sa ekonomiya, si Konsehal Goking nanawagan sa mga otoridad sa pagpakusog pa sa mga lakang sa pagmintinar sa kalinaw ug kahapsay sa kadalanan.

Kay ang luwas ug hapsay nga komunidad mao ang unang timailhan nga makadani sa mga investors nga mosalig sa usa ka dapit, sumpay ni Goking.

Tungod niini, iyang gidapit ang mga lokal ug langyaw nga kompanya nga mobubo og dugang kapital sa syudad, labi na sa mga mga mega-projects sa natad sa teknolohiya, imprastraktura, ug real estate developments.

Gilauman ni Goking nga ang tulo ka adlaw nga summit magdala og bilyon-bilyong kantidad sa pamuhunan ug magbukas og mas lapad nga merkado alang sa mga micro, small, and medium enterprises (MSMEs) sa rehiyon. (RNQ/SP)