Salcedo mitahas sa RTA nga tun-an ang mulo sa mga PUJ drivers sa Brgy. Bayabas

GITAHASAN ni Konsehal Eric Salcedo, chairman sa komite sa public utilities, ang kadagkoan sa Roads and Traffic Administration (RTA) sa pagpangita og pamaagi ug solusyon sa reklamo nga gipadangat sa mga drivers ug operators sa Barangay Bayabas kabahin sa ilang bag-ong rota diin apektado ang ilang matag-adlaw nga kinitaan tungod sa kaminus sa mga pasahero sa dapit nga ilang maagian.

Atol sa tigom sa komite, gipaabot ni Kagawad Mark Clifford sa maong barangay nga adunay ubang kapunongan sa mga drivers ang mi-undang sa ilang pagpamasahero tungod kay alkanse tungod sa kamahal sa presyo sa gasolina ug minus ang kinitaan.

Nasayran nga adunay mga bag-ong rota sa kasamtangan ang gipatuman sa RTA agig pagpangandam sa implementasyon sa Local Transport Route Plan kun LTRP.

Nunot niini, gisugyot ni Konsehal Eric Salcedo nga tun-an sa mga kawani sa RTA ang maong rota sa Barangay Bayabas aron dili magbalik balik ang problema ug dapiton ang mga apektadong driver aron mapangitaan sa tukmang solusyon. (MLR/SP)