Salcedo misugyot nga dapiton ang nagdumala sa towing services

TUNGOD sa walay insaktong impounding area ang syudad o lote nga  diin ipahimutang ang mga sakyanan nga na-towing sa Roads and Traffic Administration, gisugyot ni konsehal Eric Salcedo, chairman sa komite sa Public Utilities, nga dapiton ang mga pribadong kompanya nga maoy modumala sa pagpadagan tungod kay aduna kini insaktong ekipo alang sa maong matang sa operasyon.

Kini ang pamahayag ug sugyot ni Salcedo atol sa tigom sa komite niadtong milabayng adlaw diin gituki ang pag-amendar sa Traffic Code sa tuyo nga mapagaan ang problema sa trapiko.

Apan gikahingawa sa konsehal tungod kay dili makakombinsi sa mga magpapatigayon ang balayronon subay sa nahilatid sa Traffic Code.

Niini gitahasan ni konsehal Eric Salcedo ang opisina sa RTA nga dapiton ang mga negosyante sa syudad og mosumite sa ilang rekomendasyon alang sa nasangpit nga katuyoan. (MLR/SP)