RPT share sa kabarangayan dili angay madelatar - Ocon

GIKAHINGAWA ni Konsehal Zaldy Ocon, chairman sa komite sa Public Works, ang pagkalangan sa Real Property Tax share sa mga kabarangayan aron kanunay nilang mapatuman ang ilang mga programa nga ilang prioridad.

Kini ang reaksyon ni Ocon sa gipadangat nga special report ni Konsehal Eric Salcedo atol sa sesyon niadtong Lunes nga gidumala ni Bise Mayor Kikang Uy kabahin sa reklamo sa mga kapitanes sa syudad sa ilang Real Property Tax share.

Sumala ni Konsehal Ocon nga tataw kaayo subay sa balaod nga ang Real Property Tax matunol matag quarter ug lima ka adlaw sa dili pa matapos ang quarter kinahanglang madawat na kini sa mga kabarangayan ang ilang bahin.

Dugang ni Ocon nga ang pagkadelatar sa RPT share posibleng makaapekto sa operasyon sa mga kabarangayan kay dinhi man ang gahin alang sa mga suholan sa mga kawani sa barangay, balayronon sa ilang kuryente ug tubig ug uban pang galastuhon sa barangay.

Hinoon matud ni Ocon nga wala siyay pagsupak sa giluwatang opinion ni konsehal Alam Lim nga ang paglangan sa RPT share tungod kay aduna usay pipila ka mga barangay opisyal nga dugay mosumite sa ilang mga gisita nga rekisitos.

Nunot niini nanawagan si Ocon nga unta mahatagan kini sa igong pagtagad tungod ug alang sa kaayuhan nga matunol ang maayong pagserbisyo sa kabarangayan.