Renewal sa mkt stallholders’ bizpermits gilugwayan taman Mar 31, 2022

DUGANG panahon ang gihatag sa kagamhanan sa dakbayan ngadto sa mga mamaligyaay sa kamerkadohan dinha sa paglukat o’ pagrenew sa ilang business permits nga wala pay multa.

Sa sesyon sa konseho niadtong Lunes nga gidumala ni Bise Mayor Kikang Uy, hiniusang gipalabang ang ordinansa nga naglugway sa deadline sa pag-renew sa business license o’ permit sa tanang merkado publiko sa dakbayan taman sa Marso 31, 2022.

Si Konsehal Ian Mark Nacaya, chairman sa komite sa economic enterprises, mibutyag nga ang maong lakang nunot sa hangyo sa mga kapunungan sa mamaligyaay sa merkado sa Cogon ug Carmen kinsa mipasabot sa ilang nasinating kapit-os sa kinitaan dala sa nagpadayong pandemya.

Matod niya nga hugot nga gihangyo ang lugway aron mahatagan sila sa dugang panahon nga makapangita sa ibayad sa ilang mga obligasyon sa dakbayan human kadaghanan sa mga nag-abang og talad sa merkado minus ang kinitaan sa milabayng tuig.

Subay sa balaod, ang renewal sa business license o’ permit sa kamerkadohan nga walay ipahamtang nga multa taman lang sa Pebrero 28, 2022.

Niini, malaumon si Bise Mayor Kikang Uy nga sa maong lakang sa konseho maalibyohan ang nasinating kapit-os sa mga mamaligyaay sa kamerkadohan.

Ang maong lakang gipaluyohan sa Komite sa Economic Enterprises ug Komite sa Pamalaod ni Konsehal Ian Mark Nacaya.