Reklamo sa kasaba dihas Masterson Avenue giaksyonan sa Komite sa P.O.

DALING giaksyonan sa Komite sa Public Order sa konseho ubos ni Konsehal Romeo Calizo  ang reklamo nga gipaabot sa Homeowners Association  of Pueblo Estate.

Mahinumduman nga sa tigom sa komite niadtong Huwebes, ang representante sa homeowners mipaabot sa reklamo  mahitungod sa kasaba  nga ilang madungog   gikan sa mga  fish vendors diha sa Masterson Avenue nga gagamit og loud speakers samtang  gapamaligya gikan sa alas 12:00 sa tungang gabii paingon na sa alas 5:00 sa sayong kabuntagon nga nakadisturbo sa ilang pagpahulay.

Si Atty. Jose Edgardo Uy, chairperson sa Regulatory Compliance Board (RCB) mibutyag  nga mahimong hangyoon ang Business Permit and Licensing Division sa City Hall nga sutaon  ang ilang negosyo kon aduna ba sila’y permit.

Gitin-aw ni Atty. Uy  nga kon mogamit og public address system ang usa ka negosyo, nagkinahanglan kini og special permit gikan sa Buhatan sa Administrador.

Gidugang usab ni Uy nga  kon masuta nga wala silay special permit, sila pagaisyuhan  og didto sa permit isukip ang mga kondisyones lakip na  ang  hinay nga pagpatukar  sa ilang loud speaker aron dili ma kadisturbo sa publiko.

Gihangyo sa komite ang Licensing Division nga iapil kini sa mga rekisititos diha sa ilang pag-isyu sa permit.