Redev’t sa CDO amphitheater nakompleto na Koko gipasalamatan

DAKO ang pasalamat sa dakbayan sa Cagayan de Oro kang Senador Aquilino Martin “Koko” Pimentel III aron mapanumbalik ang Amphitheater dinha sa Plaza Divisoria.

Sa sesyon sa konseho niadtong Lunes nga gidumala ni Bise Mayor Kikang Uy, si konsehal Ian Mark Nacaya mipahibalo nga nakompleto na ang pagtrabaho sa proyekto sa redevelopment sa Amphitheater nga gipundohan ubos sa development fund sa senador.

Gani, gisubhan na ang nakompletong proyekto niadtong Lunes, Pebrero 28, dugang sa konsehal.

Mahinumduman nga ang unang amphitheater natukod sa 1950s ug nagsilbing usa sa mga landmarks sa dakbayan.

Ang pagpanumbalik sa amphitheater kabahin sa Project Lunhaw nga gilusad ni Mayor Oscar Moreno aron pagpreserba ug pagproteher sa kinaiyahan.

Usa ka resolosyon ang gipasaka sa konseho nga nagpadayag sa hugot nga pagdayeg ug pasalamat kang Senador Koko sa paningkamot nga mapanumbalik ang naandang amphitheater.