Quarterly bloodletting activity gisuportaha ni VM Uy

HUGOT nga gisuportahan ni Bise Mayor Kikang Uy ang gitakdang Blood Letting activity sa umaabot Enero 31 alang sa unang quarter ning tuig.

Kini agig pagsanong sa panawagan sa Northern Mindanao Medical Center (NMMC) alang sa donasyon sa dugo aron nga mapun-an ang nagkahurot nga supply sa dugo sa maong tambalanan tungod sa pandemya nga dala sa Covid-19.

Nasayran nga ang maong kalihokan aduna pay mosunod nga mga hugna nga ipahigayon sa umaabot Mayo 30, Septembre 30 ug Disyembre 30 alang sa ikaduha, ikatulo ug ikaupat nga quarter.

Subay sa Memorandum No. 0051-2022 nga giluwatan ni Acting City Administrator Teodoro Sabugaa-a, Jr. giaghat niini ang mga empleyado sa City Hall sa pagdonar sa ilang dugo sa gitakdang mga petsa.

Si Bise Mayor Kikang Uy mibutyag nga ang maong kalihokan dako kaayo ikatabang sa mga nanginahanglan aron nga madugtongan ang ilang kinabuhi hinungdan nga gihangyo niini ang katawhan ilabina ang mga empleyado nga kwalipikadong makohaan sa dugo sa pagdonar sa ilang dugo.