Programa sa panglawas, kaayohang sosyal gisukip sa SAIP No. 5

GIHATAGAN og dakong prayoridad sa kagamhanan sa dakbayan ang mga programa ug imprastraktura nga direktang motubag sa mga panginahanglanon sa panglawas, rehabilitasyon, ug kaayohang sosyal sa kabataan, katigulangan, ug mga pasyente sa dakbayan.Kini human nga giaprobahan sa Konseho, atol sa miaging sesyon nga gidumala ni Bise Mayor Bebot Rodriguez, pinaagi sa Resolusyon No. 15847-2026, ang Supplemental Annual Investment Program (SAIP) No. 5 alang sa Fiscal Year 2026.

Lakip sa nasukip mao ang dinalian nga interbensyon alang sa kaluwasan sa mga pasyente nga mobalor og ₱18,500,000.00 alang sa pag-instalar sa usa ka 1MW standby power generator system diha sa J.R. Borja General Hospital.

Gihimo kini aron masiguro nga dili mabalda ang operasyon sa mga kritikal nga pasilidad sa ospital ug mga modernong kahimanan sa medikal, ug aron magpabiling luwas ug padayon ang pag-atiman sa mga pasyente luyo sa bisan unsang kalit nga krisis sa enerhiya.Usab ang balor ₱5 milyones alang sa pagtukod og usa ka luwas ug daling maabtan (safe and accessible) nga Children with Disability Center sa Barangay Pagatpat.

Ang maong pasilidad gilaoman nga mahimong sentro sa rehabilitation, developmental milestones tracking, ug uban pang social welfare services, nga magtugot sa mga CWDs sa pagdawat og saktong terapiya ug pag-amoma nga libre ug daling maabtan sa komunidad.Samtang nasukip usab ang balor ₱978 mil alang sa pagpalambo sa Senior Citizens Building sa Barangay Carmen Chapter.

Ang maong edipisyo pagahimoon nga mas luwas, komportable, ug functional aron hapsay nga matunol ang nagkadaiyang social services, healthcare monitoring, ug mga benepisyo ngadto sa mga hamtong. (RNQ/SP)