Programa sa CDO sa solid waste mgmt gipalapdan

DUGANG kaarangan ang gilantaw nga mapatuman dinha sa pagtamod sa kagamhanan sa dakbayan sa probisyon sa RA 9003 kon Ecological Solid Waste Management Act of 2000.

Kini human giuyonan sa konseho sa syudad ubos ni Bise Mayor Kikang Uy ang ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa Department of Environment and Natural Resources –Environmental Management Bureau (DENR EMB) nga naglangkob sa pagtunol og usa ka unit nga Biodegradable Waste Shredder ug Composter.

Nasuta nga usa sa mga kakulian nga nasinati aron hingpit nga masunod ang RA 9003 mao ang pagmugna sa mga material recovery facilities (MRF), kakulangon sa pagpatuman sa mga probisyon sa balaod ug huyang nga solid waste diversion.

Nunot niini, ang dakbayan uban sa DENR-EMB naninguha nga masolosyonan ang maong mga kakulangon sa tinguha nga makab-ot ang dugang social ug economic development sa nasud.

Usa sa nakitang solusyon mao ang pag-provide sa biodegradable waste shredder ug composter nga maoy magpalambo sa waste diversion sa solid waste program, pamahayag ni konsehal Eric Salcedo, chairman sa komite sa environment ug usa sa nagpaluyo sa gipalabang nga ordinansa.

Niini, ang konseho ubos ni Bise Mayor Kikang Uy malaumon nga pinaagi sa padayong panagtambayayong sa dakbayan ug sa nasudnong kagamhanan mapatuman sa hingpit ang mga lakang pagproteher sa kinaiyahan.