Pagsagop sa ordinansa sa siyudad pinaagi sa resolusyon, gisuportahan ni Tabac

GISUPORTOHAN ni Konsehal Marlo Tabac ang sugyot nga mas maayong magpalabang nalang og resolusyon ang mga barangay  nga magsagop sa ordinansa sa syudad, imbis nga maghimo pa og kaugalingong ordinansa alang sa mga patakaran sama sa curfew hours.

Kini nga lakang gitumong aron malikayan ang kahasol ug masiguro nga hapsay ang pagpatuman sa curfew ordinance.

Kahinumduman nga atol sa tigom sa komite sa barangay affairs  kagahapon, gipasabot ni Konsehal Egay Uy sa Regulatory and Complaint Board (RCB) nga pinaagi sa maong lakang, masiguro ang consistency sa balaod.

Hinoon, mipasabot si Konsehal Tabac nga uyon siya sa maong lakang labina sa impeimentasyon sa curfew hours tungod kay nindot kaayo ang ordinansa sa syudad ug sa maong paagi dili na sila mahasol gawas nga nalipay usab siya tungod kay nagsuporta ang mga  barangay  karon diha  sa ilang  pagtubag sa  gikinahanglang lakang sa ilang mga barangay. (JRG/SP)