Pagrehabilitar sa mga kanal gipundohan sa Brgy 12

GILANTAW sa Konseho sa Barangay 12 nga mahatagan og kasegurohan ang ilang katawhan nga luwas  panahon sapagbaha sa ilang dapit.

Kini human giplabang sa konseho atol sa regular sesyon niadtong Lunes nga gidumala ni Majority Floor Leader Konsehal Edgar Cabanlas ang resolusyon nga nagdeklarar sa ordinansa sa maong barangay diin nasukip ang ilang 2026 Annual Budget nga mobalor og P4,329,120.00 aron gamiton sa pagpatuman sa gihan-ay nga mga programa ug proyekto karong tuiga.

Gihatagan og prayoridad sa barangay ang mga proyekto ug programang gipundohan ubos sa 20% Development Fund nga naglakip sa pagrehabilitar sa mga kanal ug pagtukod og recovery facility nga mobalor og P468,170.00.

Lakip sa gipundohan sa barangay ang pagtunol og benepisyo sa mga kawani niini, maintenance expenses nga naglakip sa training, gamit sa opisina, programa sa GAD, nutrisyon, sa panglawas, Senior Citizens, PWD’s ug uban pang operating expenses.

Gigahin usab ang igong pundo alang sa pagpatuman sa mgalakang pagtubag sa panginahanglan sa katawhan panahon sa kalamidad, pagpamalit og mga kahimanan nga magamit kon adunay kalamidad, programa alang sa kabatan-onan, paugnat sa kusog ug uban pa nga makaaghat sa katawhan nga makiglambigit sa mga kalihokan sa dapit.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ni Konsehal Edgar Cabanlas. (RNQ/SP)