Pagregulate sa mga piggery diha sa Indahag gisugyot

SUPORTADO ni Konsehal Marlo Tabac ang ordinansa sa Barangay Indahag nga mag-regulate sa operasyon sa piggery o kadtong gapamuhi og baboy diha sa ilang dapit.

Sa tigom sa komite niadtong Martes, si Indahag SK Chairman John Floyd Labiano nibutyag nga tumong sa ordinansa nga ma-regulate ang mga piggery o operasyon sa gapamuhi og baboy tungod sa kadaghang reklamo nga ilang gakadawat gumikan sa baho ug mipasabot nga pinaagi unya sa maong ordinansa, ilang malukatan og permit ug ma-inspeksyon ang mga piggery nga anaa natukod sa ilang barangay.

Sa maong higayon, ang representante sa City Veterinary Office (CVO) mipadayag nga wala silay pagsupak sa maong ordinansa labina nga daghan na kaayong reklamo kabahin sa baho sa mga tangkal nga nakaapekto sa panglawas, apan ilang girekomendar nga ma-align kini sa kasamtangang Bantay ASF ordinance sa syudad ug kinahanglan pod nga makonsiderar ang zoning classification sa dapit.

Sa ilang bahin, ang City Local Environment and Natural Resources Office (CLENRO) namahayag nga wala silay supak sa maong ordinansa apan ang City Health Office misugyot nga kinahanglan nga sutaon ug iplastar ang zoning sa lugar kay kon kini residential dili gayod kini pwede tukoran sa tangkal o buhian sa baboy, segun sa balaod.

Niini, gihangyo sa komite ang maong mga buhatan sa pag-submit sa ilang mga written recommendation o’ observation   sa maong sugyot ordinansa aron kini iduso sa City Legal Office alang sa ilang dugang pagtuon. (JRG/SP)