Pagproteher sa kadagatan mapalapdan

GILANTAW nga mapalambo ug mapalapdan ang mga lakang pagproteher sa kadagatan sa barangay Bayabas, Bonbon, Gusa, Cugman ug Puerto, ning syudad.

Kini human ang konseho sa dakbayan sa sesyon niadtong Lunes nga gidumala ni Bise Mayor Kikang Uy mipalabang sa ordinansa nga naghatag og panugot ni Mayor Oscar Moreno pagpirma sa Memorandum of Understanding (MoU) tali sa lokal nga kagamhanan sa lima ka barangay nga girepresentahan sa ilang mga kapitan kalabot sa pagdumala sa gitumbok nga mga Marine Protected Areas (MPAs).

Ang maong lakang kabahin sa programa sa nasudnong kagamhanan dinha sa pag-establisar og MPAs sa tibuok nasod sa tinguha nga mapotekhan sa hingpit ang kadagatan.

Ubos sa maong MOU, ang dakbayan pinaagi sa City Agriculture Office –Fisheries Division motunol sa technical assistance dinha sa pagsagop sa MPAs alayon sa Management plan ug uban pa.

Samtang ang napiling barangay mao ang manguna sa pagmatikod ug pagmintinar sa mga dapit subay sa mga giya nga nahilatid sa plano ug mopatuman sa balaod ug regulasyon nunot sa MPA management plan.

Gipasabot nga ang kalampusan sa maong lakang magdepende sa kolaborasyon sa lokal nga kagamhanan, sa barangay, mga mangingisda, publiko ug pribadong sector ingon man ang mga nailing non-government organization ug uban pang ahensya sa gobyerno.

Ang ordinansa nga gipalabang sa konseho alang sa maong katuyuan gipaluyuhan sa komite sa fisheries and aquatic resources ni Konsehal Zaldy Ocon ug komite sa pamalaod ug reglamento ni Konsehal Ian Mark Nacaya.