Pagpreserba sa bakhawan dihas Bonbon gipalapdan

HUGOT nga gisuportahan sa Konseho sa syudad ubos ni Bise Mayor Kikang Uy ang mga lakang pagproteher sa kinaiyahan.

Sa sesyon sa Konseho niadtong Lunes hiniusang giuyonan ang ordinansa nga naghatag og katungod ni Mayor Oscar Moreno pagpirma sa Memorandum of Understanding (MoU) tali sa Xavier University –Ateneo de Cagayan pinaagi sa McKeough Marine Center (XU-MMC) ug Sari-Sari Fishermen Association (SSFA-PO).

Kini alang sa pagpatuman sa programa dinha sa pagdumala ug pagproteher sa bakhawan dinha sa barangay Bonbon.

Mahinumduman nga una nang gipatuman ang Mangrove Mapping project dinha sa Macajalar Bay niadtong tuig 2018 diin kompletong nahimo ang biophysical profile sa mga mangrove potential sites ug natukod ang pipila ka mangrove nurseries.

Niini, namugna ang proyekto nga magpalig-on sa kapasidad sa mga kapunungan dinha sa pag-rehabilitate sa mga mangrove areas sa Macajalar Bay.

Sa MoU, magtambayayong ang kagamhanan sa dakbayan ug XU-MMC pag-abag sa SSFA-PO aron maprotektahan ug mapalambo ang bakhawan dinha sa barangay Bonbon.

Ang ordinansa nga gipalabang sa Konseho gipaluyohan sa Komite sa Environment ni Konsehal Enrico Salcedo, komite sa Fisheries ni Konsehal Zaldy Ocon ug Komite sa Pamalaod ni Konsehal Ian Mark Nacaya.