Paglimpyo sa Bigaan Creek,env’t expo ipahigayon


IPAHIGAYON ugmang adlawa ang pagpanglimpyo sa Bigaan Creek sa barangay Cugman.

Mao kini ang kasayuran nga nadawat ni Bise Mayor Kikang Uy gikan sa kadagkoan sa City Local Environment and Natural Resources Office (CLENRO).

Kini ang usa sa mga kalihokan nga nahan-ay pahaum sa kasaulogan sa Environment Month dinhi sa dakbayan sa Cagayan de Oro ubos sa Recognizing Individuals/Institutions towards Vibrant and Enhanced Rivers (R.I.V.E.R.S.) for Life Clean-up.

Lakip sa ipahigayon ugmang adlawa mao ang pagpahimutang sa Trash to Cash Back Booths diin ang katawhan mahimong magdala sa ilang mga recyclables aron mabaligya.

Dugang gihikay nga kalihokan mao ang “A Tree for your Blood Project”, usa ka bloodletting project nga himuon dinha sa City Hall sa umaabot Hunyo 27, 2022 sa alas 8 sa buntag hangtod sa alas 12 sa udto.

Dako ang panghinaut ni Bise Mayor Uy nga mapahimuslan sa katawhan ang giandam nga mga kalihokan nga gitumong sa pagmintinar ug pagproteher sa kinaiyahan. (SP/JNortiza)