Pag-cluster sa vaccination sa mga hamtong, gisugyot ni konsehal Lao


SI Konsehal Teodulfo Lao, Jr., chairman sa komite sa Public Utilities misugyot nga pinaagi sa presentasyon ni Konsehal Malou Gaane, chairman sa komite sa panglawas sa konseho, hangyoon ang buhatan sa City Health ug sa Department of Health (DOH) nga i-cluster ang pagbakuna sa mga hamtong diha sa kabarangayan sa syudad.

Kini ang reaksyon ni Lao sa special report ni Konsehal Reuben Daba atol sa sesyon niadtong Lunes nga gidumala ni Bise Mayor Kikang Uy sa sugyot niining paghatag insentibo sa mga hamtong diha sa ilang pagpabakuna.

Gipasabot ni Lao nga pinaagi sa pag-cluster sa vaccination sa barangay hayan dili na mahasol ang mga hamtong pag-adto sa vaccination area.

Ang barangay ang maghatag og listahan sa mga hamtong nga wala pa nabakunahi aron mismo ang mga hintungdang personahe na ang moadto aron deretso matunol ang serbisyo nga ilang gikinahanglan, pamahayag ni Konsehal Lao.

Sa laing bahin, gihangyo ni Konsehal Lao nga makonsidera usab ang ubang sektor sa komunidad sama sa PWDs nga nawad-an og trabaho tungod sa pandemya kun ugaling hatagan og insentibo ang mga hamtong sa syudad.

Niini nagto-o si konsehal Lao nga pinaagi sa pag-cluster sa vaccination mahatagan sa kasayon sa pagpabakuna ang mga hamtong syudad.