Ordinansa sa Brgy. 39 tun-an sa komite sa barangay affairs

GIHINGUSGAN sa Konseho sa Barangay 39 nga masolbad ang kahuot sa trapiko ug masiguro ang kaluwasan sa publiko.

Nagpasa og usa ka ordinansa ang konseho sa maong barangay batok sa illegal parking ug illegal terminal diha sa Mortola Street nga ilang gitawag og "Mortola Street Traffic Decongestion Ordinance of 2026."

Gidili sa maong ordinansa ang pagparking ug ang pagtukod sa mga dili awtorisadong terminal sa sakyanan subay sa dalan Mortola.

Matod sa barangay nga ang illegal terminal ug pataka nga pag-park sa mga salakyan nagdala og dakong kahuot sa dagan sa trapiko.

Gawas niini, peligro usab kini alang sa mga lumalabay o pedestrians, ingon man sa mga drayber, ug nagahatag og negatibong epekto sa kahapsay, kaluwasan, ug kasayon sa ilang mga lumulupyo.

Pinaagi niini nga lakang, magpatuman ang kagamhanan sa barangay og mga pamaagi aron ma-regulate ang mga salakyan, masilotan ang mosupak, ug hingpit nga mapagaan ang trapiko sa Mortola Street.

Ang maong ordinansa giduso ni Bise Mayor Bebot Rodriguez ngadto sa komite sa barangay affairs ni Konsehal Marlo Tabac alang sa dugang pagtuon.  (RNQ/SP)