Ocon nahingawa sa walay sulbad nga problema sa panubig

HUGOT nga gikahingawa ni Konsehal Zaldy Ocon ang padayong problema sa supply sa tubig dinhi sa dakbayan.

Kini ang unod sa special report sa Konsehal sa sesyon sa konseho niadtong Lunes nga gidumala ni Bise Mayor Kikang Uy.

Si Ocon mibutyag nga dugay nang panahon nga nasinati ang problema sa panubig ug hangtod sa kasamtangan padayon gihapon kining natagamtaman sa daghang barangay sa syudad.

Matod niya nga daghan nang nahitabong omento sa presyo sa tubig sa Cagayan de Oro Water District (COWD) apan wala gihapon kini nakahatag sa abundang supply sa tubig ug gani dako pa hinoon ang multa nga gakabayaran sa mga konsumeador kun madelatar sa pagbayad.

Wala may laing pangutan-on sa katawhan sa maong problema kun dili kitang mga pinili sa katawhan hinungdan nga angayan kining tutukan ug hatagan sa pagtagad alang sa kaayohan sa tanan.

Gani, gikatingala usab ni Ocon nga sa miaging panahon, aduna untay laing supplier sa tubig nga mitanyag og baratong presyo ug nindot nga serbisyo apan kini gibalibaran.

Nanghinaot sa Ocon nga mahatagan kining problema sa tubig sa igong pagtagad alang sa kaayuhan sa tanan.