Ocon di uyon ibalhin mga minatay dihas Bolonsiri

DILI uyon si Konsehal Zaldy Ocon, chairman sa komite sa public works, sa planong pagbalhin sa mga minatay nga gilubong dinha sa Bolonsiri public cemetery.

Kini ang unod sa iyang special report atol sa sesyon sa konseho niadtong Lunes nga gidumala ni Bise Mayor Kikang Uy.

Sumala ni Ocon nga wala siyay pagsupak sa mga proyekto nga gipatuman sa lokal nga kagamhanan ilabi na makahatag kini og kalamboan sa syudad ug makabenepisyo sa katawhan.

Gani, matod ni Ocon, nga suportado niya ang plano sa syudad nga maghimo og dugang sam-ang alang sa mga igsoong muslim.

Iyang gisugyot nga mangita ang gobyerno og laing luna nga katukuran sa bag-ong sam-ang sa syudad.

Niini, si Konsehal Roger Abaday, chairman sa komite sa senior citizens, mipasabot nga giagi sa makuting pagtuon sa mga eksperto ang planong redevelopment sa Bolonsiri Public Cemetery nga gitinguha sa paghatag og kaayuhan sa kinabag-ang katawhan sa dakbayan.

Matod ni Abaday nga usa siya nga mipakita og pagsupak sa planong redevelopment apan sa dihang gipasabot kaniya ang tumong ug katuyuan sa proyekto nakumbinsi siya sa pagsuporta tungod kay tumomg niini nga mahatagan sa sa kaugmaran ang kinabuhi sa katawhan kinsa maoy labing maapektohan panahon nga maguba ang kinaiyahan dinha sa nahisgotang dapit.