National Baptist Day gideklara sa CDO

Gideklara sa konseho sa syudad ubos ni Bise Mayor Bebot Rodriguez ang ikaduhang Huwebes sa Enero matag tuig nga National Baptist Day sa dakbayan sa Cagayan de Oro. Kini human ang konseho sa sesyon kagahapon mipasaka sa resolosyon alang sa maong katuyuan.

Si Konsehal Ian Mark Nacaya, nangamahan sa resolosyon, mibutyag nga ang maong lakang nunot sa pag-ila sa walay puas nga evangelical mission sa pundok sa mga Baptists nga nakatabang sa pagpanday sa nasud pinaagi sa pagtukod og mga Kristiyanong tunghaan nga nagtudlo og academic excellence ug nakamugna og maligdong nga kinaiya sa matag indibidwal.

Ang pundok naila usab dinha sa pagmatuto sa ilang mga gisakopan pinaagi sa pagproklama ug pagpa-ambit sa ebanghilyo alang sa pagkab-ot sa maayong komunidad.

Ang pagdeklara sa maong adlaw maghatag usab og bili sa mga kalihokan nga ipahigayon sa mga Baptists nunot sa ilang kasaulogan.