MOA sa pagtinabangay sa DA aprobado sa konseho

DUGANG kaugmaran ang matagamtaman sa sektor sa agrikultura ug sa mga mag-uuma sa dakbayan.

Kini human giaprobahan sa konseho ubos ni Bise Mayor Bebot Rodriguez ang Ordinance No. 15454-2026 nga naghatag og katungod ni Mayor Klarex Uy sa pagpirma sa Memorandum of Agreement (MOA) alang sa pakig-alayon sa Department of Agriculture-Regional Field Office 10 (DA RFO 10) ug sa Guinitan Upland Farmers Association.

Ubos sa maong MOA, pormal nga itugyan sa DA RFO 10 ang usa (1) ka unit sa Mechanical Corn Sheller nga nagkantidad og ₱300,000.00 ngadto sa Guinitan Upland Farmers Association, Barangay Pagalungan isip grant gikan sa DA.

Tumong sa maong ekipo nga mapadali, mapagaan ang pagtanggal sa mga lugas sa mais, mapauswag ang produksyon ug kinitaan sa mga mag-uuma sa upland nga bahin sa syudad.

Ang maong lakang kabahin sa padayong pagtinabangay sa kagamhanang lokal ug sa DA aron mahatagan og moderno nga kahimanan ug panginabuhian ang mga nanginahanglan nga sektor sa agrikultura sa syudad.

Ang maong ordinansa nga gipalabang sa Konseho alang sa maong katuyoan gipaluyohan sa komite sa agriculture ni Konsehal Antuy Pascual ug sa komite sa pamalaod ug reglamento ni Konsehal Edgar Cabanlas. (RNQ/SP)