Mga programa sa SK Gusa gilantawng mapatuman na

Mokabat sa P991,583.00 ang gigahin sa Sangguniang Kabataan (SK) sa Barangay Gusa aron magamit pagpatuman sa mga programa nga magdala og dugang kalamboan ug maghatag sa gahum ngadto sa kabatan-onan.

Kini human gisumete sa SK sa barangay Gusa ang ilang 2023 Annual Budget ngadto sa komite sa Sports and Youth Development ni Konsehal John Michael Seno nga adunay gibanabanang kinitaan ug galastohon balor P3,170,583.00.

Gihatagan sa prioridad nga mapatuman karong tuiga ang pagpalit og usa ka unit nga airconditioner, usa ka unit nga smart television, usa ka unit nga computer set, usa ka unit nga digital single lens DSLR, usa ka unit nga printer, projector ug laptop.

Gigahinan usab og igong pundo ang pagpalit og furniture, fixtures, filing cabinets, mono block chairs ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang dapit.