Mga programa, proyekto sa Brgy. San Simon mapatuman na

MAHIMO nang ipatuman sa Barangay San Simon ang ilang gihan-ay nga mga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay nga may kalabotan sa ilang 2026 Annual Budget nga adunay gibanabanang kinitaan ug  galastuhon balor ₱6,416,569.

Lakip sa gipundohan mao ang 20% Development Fund balor  ₱888,458.00; samtang ₱641,657.00 usab ang gigahin alang sa pagpatuman sa mga programa sa Sangguniang Kabataan; ₱320,828.00 alang sa Barangay Disaster Risk Reduction Management Fund; ₱15mil sa programa alang sa Senior Citizen ug PWDs; ₱150,000.00 ang gigahin alang sa rehabilitasyon sa ilang water supply system ug uban pang mga programa nga gilantawng maghatag kaarangan sa ilang serbisyo ngadto sa katawhan.

Ang 2026 annual budget sa Barangay San Simon miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang mapatuman.

Ang resolusyon nga gipalabang sa Konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug sa komite sa pamalaod ni Konsehal Edgar Cabanlas. (MLR/SP)