Mga programa, proyekto sa Brgy. Canitoan mapatuman na

MAHIMO nang ipatuman sa Barangay Canitoan ang ilang gihan-ay nga mga programa ug progyekto nga gipundohan karong tuiga.

Kini human ang Konseho sa Syudad sa milabayng sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P45,618,914.00.

Lakip sa gipundohan mao ang 20 porsentong (20%) Development Fund balor P8,112,928.00; samtang P4,561,891,00 usab ang gigahin alang sa pagpatuman sa mga programa sa Sanguniang Kabataan; P2,280,946.00 alang sa Barangay Disaster Risk Reduction Management Fund; P340,000.00 sa programa sa Senior Citizens; P2,100,000.00 ang gigahin alang sa pagpalit ug Mini Dump Truck ug uban pang mga programa nga gilantawng maghatag ug dugang kaarangan sa ilang serbisyo ngadto sa katawhan.

Ang 2025 annual budget sa Barangay Canitoan miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (MLR/SP)