Mga programa, proyekto sa Brgy. Balubal mapatuman na

MAPATUMAN na sa Barangay Balubal ang ilang gihan-ay nga mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Martes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P13,614.521.00.

Lakip sa gipundohan mao ang 20 porsyentong (20%) Development Fund balor P2,342,042.00; samtang P1,361,452.00 usab ang gigahin alang sa pagpatuman sa mga programa sa Sangguniang Kabataan; P580,000.00 ang gipundo alang sa pagtul-id sa ilang local roads; P250,000.00 alang sa pag-instalar sa ilang street lights; P50 mil sa programa sa Senior Citizens ug PWDs ug uban pang mga programa nga gilantawng maghatag og dugang kaarangan sa ilang serbisyo ngadto sa katawhan.

Ang 2025 annual budget sa barangay Balubal miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing daling panahon.

Ang resolusyon nga gipalabang sa konseho alang sa maong katuyoan gipaluyohan sa komite sa

barangay affairs ni Konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (MLR/SP)