Mga iskolar sa dakbayan gipasalamatan ni Konsehal Suzette

Si Konsehal Suzette Magtajas-Daba, chairman sa komite sa Edukasyon sa konseho hugot nga mipasalamat sa mga Iskolar sa Dakbayan (IsDa) sa Barangay Taglimao.

Kini human sila boluntaryong miabag sa gipahigayon nga Mobile Vaccination kontra Covid-19 virus sa miaging semana diha sa ilang Covered Court.

Matod sa konsehala nga taliwala sa kalinghod sa pangedaron anaa sila nagasuporta ug mitabang nga mapaabot ang bakuna ngadto sa komunidad sa ingon mapanalipdan ang katawhan ug maluwas sa hulga sa Covid-19.

Gipasalamatan usab ni Konsehal Suzette ang kagamhanan sa dakbayan nga gidala nila ang bakuna ngadto sa tugkaran sa kabukiran sa tinguha nga mabakunahan gayud ang tagsa-tagsa ka myembro sa pamilya lakip na tibook komunidad aron wala nay kahadlok nga matakdan sa virus dala sa Covid-19.

Dugtong niini, gipasalamatan usab ni Konsehal Suzette sa mobile vaccination sa kalampusan uban sa panabang sa mga opisyal sa barangay pinangulohan ni Kapitan Reuben Obsioma ug ilang mga Barangay Health Workers nga diin gibanang-banang mokabat 400 ang nabakunahan sa unang dose.

Niini, malaumon ang konsehal nga daghan pang magpabakuna sa mga umaabot nga skedyol sa Mobile Vaccination diha sa kabukiran.