Laraw pagtukod og SSTF gisuportahan sa konseho

GIPALABANG sa konseho ning siyudad sa ilang regular nga sesyon kagahapon nga gidumala ni Vice Mayor Bebot Rodriguez ang resolusyon nga nagpahayag sa walay pagsupak o interposing no objection sa sugyot sa Agua de Oro Resources Inc. nga magtukod og usa ka hiniusang septage ug sewerage treatment facility.Kini nga proyekto gipresentar sa ilang Chief Operating Officer nga si Ralph Vincent Abragan, kinsa pormal nga mipadayag sa tinguha sa kompanya sa pagdumala sa maong pasilidad.Ubos sa maong sugyot, ang Agua de Oro Resources Inc. maoy mopundo, magtukod, mag-operate, ug magmintinar sa maong pasilidad aron masiguro nga kini hingpit nga mosubay sa probisyon sa Republic Act No. 9275 o ang Philippine Clean Water Act of 2004, dungan sa uban pang mga regulasyon sa kalikopan ug lokal nga palisiya sa gobyerno.

Matod pa ni Abragan nga samtang ang kasamtangang mga proyekto sa suplay sa tubig nagpasalig sa paghatag og luwas ug kasaligan nga mainom nga tubig ngadto sa mga panimalay, patigayon, ug industriya, ang gisugyot nga septage ug sewerage management system maoy motubag sa dungan nga pagsaka sa namugnang wastewater o hugaw nga tubig.Sumala pa nga gidesinyo ang maong sistema aron epektibong makolekta, mabalhin, malimpyohan, ug malabay ang mga wastewater sa paagi nga malungtaron ug luwas sa kalikopan.

Pinaagi niini, mapanalipdan ang Suba sa Cagayan de Oro, ang groundwater resources, ug ang Macajalar Bay batok sa bisan unsang kontaminasyon.

Ang resolusyon nga gisagop sa konseho alang sa maong katuyoan gipaluyohan sa komite sa environment ni Konsehal Enrico Salcedo ug komite sa pamalaod ug reglamento ubos ni Konsehal Edgar Cabanlas. (JRG/SP)