Lao misugyot nga lakip hatagan pagtagad ang uban problema sa trapiko

GIHANYO ni Konsehal Teodulfo Lao Jr., chairman sa komite sa public utilities, ang mga kadagkuan sa Roads and Traffic Administration (RTA) nga lakip nila sulbaron ang ubang problema sa trapiko sa syudad.

Kini ang gipaambit nga sugyot ni Konsehal Lao atol sa tigom sa komite sa roads and traffic management ni Konsehal Romeo Calizo diin gituki ang “no right turn in red light” sa mga nagkadaiyang intersection sa syudad nga maoy special report ni Konsehal Nacaya atol sa sesyon ni-adtong Lunes.

Sumala ni Lao nga mahimo kining eye opener sa mga opisyal sa RTA nga mo-implementar sa balaod sa trapiko nga walay gitumbok nga probation sa ordinansa nga mahimong makahatag og kalibog sa mga motorista.

Niini nanghinaot si Konsehal Lao nga unta lakip usab matotokan ug matun-an sa RTA ang ubang problema sa dagan sa trapiko sa dakbayan sama sa no left turn aron magiyahan ang katawhan ug kinahanglan suportado sa ordinansa sa dakbayan.