Konseho mipasidungog sa COCPO sa malinawong rally sa syudad

HINIUSANG giuyonan sa konseho sa syudad atol sa sesyon niadtong Lunes nga gidumala ni Bise Mayor Bebot Rodriguez ang resolusyon nga nagpasidungog ni P/Col.Gerardo Ulanday, ang bag-ong hepe sa Cagayan de Oro City Police Director, sa Task Force Oro ug uban pang ahensya sa goberno nga naghatag sa igong seguridad nga miresulta sa malinawon ug malampuson nga rally kontra korapsyon dinhi sa syudad niadtong Dominggo.

Kini human nasayran nga gihimo sa kapolisan ang ilang tahas inabagan sa mga nagpakabanang sektor aron masiguro nga mahatagan sa seguridad ug mapanalipdan ang katawhan nga nagpadayag sa ilang kadismaya tungod sa isyu sa korapsyon sa nasud.

Ang resolusyon nga gipalabang sa Konseho alang sa maong katuyoan gipangamahanan ni Konsehal Roger Abaday, chairman sa komite sa public order and safety. (MLR/SP)