Kikang nalipay sa padayong kalamboan sa natad sa edukasyon

DAKO ang kalipay ni Bise Mayor Kikang Uy sa padayong natagamtamang kalamboan ug kaarangan sa natad sa edukasyon dinhi sa dakbayan.

Kini human si OIC District Engineer Gabriel Guinitaran sa DPWH-Region 10 nagpadangat sa taho ngadto sa bise mayor sa mga proyektong nakompleto ug padayong gitrabaho.

Lakip niini sa nakompleto na pagtrabaho mao ang duha ka andanang gambalay nga adunay upat ka lawak saringan sa East City Central School sa barangay Lapasan ug usa ka andana nga adunay duha ka lawak saringan nga edifisyo sa Balubal Elementary School.

Ang maong edifisyo dili lamang dako og ikatabang nga makabaton og haruhay nga tunghaan ang mga tinun-an kun dili makatabang usab aron maangkon ang de kalidad nga edukasyon sa kabataan.

Niini, mipasalamaton ang bise mayor sa kagamhanan sa kanunay nga paghatag og prayoridad sa natad sa edukasyon nga maoy usa sa labing mahinungdanong hinagiban aron makaangkon sa kabataan ang kaarangan sa umaabot nga panahon.

Kusganon usab nga gipaabot ni Bise Mayor Uy ang pasalamat ngadto sa DPWH sa kanunay pag-abag sa dakbayan dinha sa pagpatuman sa mga proyekto ug programa.