Kikang misuporta sa panawagan sa Covid TF ngadto sa katawhan nga magpabakuna

SI Bise Mayor Kikang Uy uban ang tibouk Konseho sa dakbayan mipadayag sa ilang suporta sa panawagan sa Covid-19 Task Force sa syudad nga mapalapdan pa ang nagpadayong vaccination program sa gobyerno.

Ang bise mayor mibutyag nga dako og makatabang ang pagpabakuna aron maproteksyonan ang matag usa batok sa Covid-19 ug nga dili mamahimong severe ug posibleng makabsan sa kinabuhi kun matakbuyan man.

Sumala niya nga ang paspas nga pagpamakuna kontra Covid-19 dako og natabang aron makuha ang gitumbok nga 70% sa populasyon ang mabakunahan ug makab-ot ang herd immunity nga maaoy mahimong dalan aron mapanumbalik ang pag-usbaw sa ekonomiya dili lang sa dakbayan kun dili sa tibouk nasud.

Niini, naghangyo si Bise Mayor Kikang Uy sa katawhan sa dakbayan ilabina ang mga opisyal sa kabaranggayan ug uban pang non-government sector ug pribadong sector nga suportahan ang vaccination program sa gobyerno pinaagi sa pagdasig niadtong wala pa mabakuhanan ug kadtong nagkinahanglan sa booster shots nga magpabakuna kay kini ang bugtong paagi nga makabalik sa normal nga kahimtang.