Kalamboan sa mga kooperatiba gilantaw sa pagmugna sa PECDO

MALAUMON si Bise Mayor Kikang Uy nga dako og makatabang alang sa dugang pagserbisyo ug kaarangan sa mga kooperatiba ang gisugyot nga pagmugna sa People Empowerment and Cooperative Development Office (PECDO).

Kini human nadawat sa buhatan sa konseho ang panahom gikan sa opisina sa City Legal Office ni Atty. Jose Sabanal nga nagpadayag sa pag-uyon sa gisugyot nga ordinansa alang sa maong katuyuan.

Ubos sa sugyot ordinansa, giila ang dakong papel sa mga kooperatiba isip mga kapunungan nga gimugna alang sa kaarangan sa kinabuhi sa tagsa tagsa ka mga sakop ug ang pag-operate og business enterprise base sa panagtambayayong.

Kun mamugna ang buhatan gilantaw nga makunhoran ang kapobrehon ug makab-ot ang dugang kalamboan ug kaarangan sa kinabuhi ilabina sa ubos nga hut-ong sa katilingban, pamahayag ni Bise Mayor Uy. (SP/MLRapanot)