Hugot nga police visibility ug checkpoint operation gisugyot ni Abaday

HUGTANONG gisugyot ni Konsehal Roger Abaday, chairman sa komite sa Senior Citizen, ngadto sa mga opisyal sa Cagayan de Oro City Police Office (COCPO) ang kanunay pagpahigayon sa pagpatrolya ug pagpahigayon og mga checkpoint ilabina sa mga dapit nga gitawag nga crime prone areas dinhi sa syudad.

Kini ang unod sa special report ni Abaday sa sesyon niadtong Lunes nga gidumala ni Konsehal Edna Dahino.

Sumala ni Abaday nga miabot na sa upat ka kaso sa pagpamusil ang natigayon sa Barangay Pagatpat diin hangtud karon wala pa masulbad sa kapolisan ang maong krimen.

Matud ni Abaday nga unang biktima sa pagpangluthang diha sa nasangpit nga dapit mao ang usa ka Construction Engineer nga gisundan sa negosyante nga si Caloy Lam, aduna usab gipusil diha sa relocation area sa Calaanan ug kining bag-o ang pagpangluthang ni Barangay Kagawad Roland Sherwin “Tawee” Uy uban sa iyang sinaligan.

Nagtoo si Abaday nga pabiling wala pa masulbad sa kapolisan ang maong mga krimen sa hinungdan nga kulang ang pag-establisar sa mga ebedensya aron maila ang suspetsado ug ang kakulangon sa kooperasyon sa mga molopyo nga mohatag sa impormasyon sa atong kapolisan.

Samtang gihangyo usab sa konsehal nga subling tun-an sa kapolisan ang ilang mga plano ug stratehiya alang sa pagmintinar sa kahusay ug kalinaw sa dakbayan.

Niini hiniusang gisagop sa konseho ang resolosyon nga giduso ni Konsehal Abaday sa tinguha nga masumpo ang mga krimen nga gakahitabo sa syudad.