HOAs makabenepisyo sa 20% equity assistance

GILANTAW nga mas madali na unya ang pagbaton og desenteng pinuy-anan ang mga kabos nga pamilya sa dakbayan human gipasar sa konseho ubos ni Bise Mayor Bebot Rodriguez ang Ordinance No. 15460-2026 nga maghatag og 20% equity financial assistance alang sa off-site land acquisition.Aron mapahimuslan ang maong tabang-pinansyal, ang mga Homeowners Associations (HOAs) kinahanglan nga lehitimong rehistrado sa Department of Human Settlements and Urban Development (DHSUD) ug giila sa lokal nga kagamhanan.Pinaagi niini nga ordinansa, ang kagamhanang lokal sa dakbayan moabag sa 20% sa kinatibuk-ang kantidad sa yuta nga paliton sa usa ka Homeowners Association  sa gawas sa ilang kasamtangang dapit (off-site).

Tumong niini nga mapagaan ang inisyal nga bayranan o down payment nga kasagarang gikinahanglan sa mga banko o sa Social Housing Finance Corporation (SHFC), aron mas mapadali ang pag-proseso sa relokasyon ug urban development.

Gawas sa paghatag og kasigurohan sa yuta, gilaoman usab sa kagamhanang lokal nga kini nga lakang mag-aghat og dugang obligasyon, kooperasyon, ug aktibong partisipasyon sa mga benepisyaryo sa pag-atiman ug pagpalambo sa ilang umaabot nga komunidad.

Matod ni Konsehal Edgar Cabanlas, majority floor leader,  gikinahanglan nga paspasan ug kab-oton ang target nga liboan ka mga affordable housing units alang sa atong nagtubo nga populasyon.

Kini nga 20% equity counterpart usa ka pamaagi aron ang gobyerno mismo ang motulod sa atong mga kaigsoonang kabos aron dali nilang maangkon ang yuta nga pagaturokan sa ilang mga balay, sumpay ni Cabanlas. (RNQ/SP)