Hangyo sa Oro Transport tukion sa Public U

TUKION sa komite sa public utilities ni Konsehal Teodulfo Lao Jr. ang mulo sa mga sakop sa Oro Transport Service Cooperative kalabot sa pagbiyahian sa mga bus dinha sa rutang gidagan ilang mga sakyanan.

Sumala ni Samuel W. Abello, manager sa kooperatiba, nga sa kasamtangan nahunong ang implementasyon sa public utility vehicle modernization program sa gobyerno alang sa tanang transport cooperative tungod kay wala pa matibawas ang paghimo sa Local Public Transport Route Plan (LPTRP) sa dakbayan.

Apan ilang namatikdan nga nahatagan sa panugot nga makakuha sa mga pasahero ang dagkong bus nga ang ruta alang unta sa mga gagmayng pang publikong sakyanan diha sa national highway gikan sa Iponan paingon sa Bugo ug vice versa.

Dugang pa, gipadayag usab nga wala pa man ma-amendar sa ordinansa sa syudad nga gilimitahan ang ruta sa mga bus pag-agi diha sa dalan Claro M. Recto paingon sa Westbound terminal ug Agora terminal.

Matod pa nga ang operasyon sa mga dagkong bus dinha sa national highway naka-apekto sa kinitaan sa mga gagmayng pampublikong sakyanan.

Buot sa kooperatiba nga mahatagan sa katin-awan ang mga palisiyang gipatuman sa kasamtangan agig pangandam sa hingpit nga implementasyon sa PUV modernization program.