Hangyo sa mga cockpit owners sa syudad giaksyonan ni Abaday

GIHATAGAN pagtagad ni Konsehal Roger Abaday, chairman sa komite sa games and amusement, ang hangyo ug panawagan sa mga tag-iya sa bulangan nga unta matugutan na ang operasyon sa sabongan dinhi sa syudad.

Atol sa tigom sa komite ni-adtong milabayng martes, gihangyo sa mga cockpit owners nga malakip sila nga makonsidera human napa-ubos na sa quarantine level-2 ang dakbayan tungod sa pagkunhod sa kaso sa covid-19.

“Andam kaming mosunod ug mopatuman sa mga gabayan sa IATF ilabe ang pag dili pagpa sulod sa dili fully vaccinated, pamahayag sa mga cockpit owners.

Gipasalig usab nila nga strikto nilang ipatuman ang minimum health standard sama sa pagkuha sa temperature,pagsoot sa facemask, pagbutang ug handwashing facility ,physical distancing ug pagdestino og mga marshal nga maoy magbantay ug mobadlong sa mga tawo nga dili motuman sa protocol.

Hinoon gisugyot ni Konsehal Abaday ngadto sa mga cockpit owner nga muduso og iniusang resolsusyon nga mag presentar ang ilang mga hangyo ingon man personal nga makig atubang sa mayor aron mapaminaw ang ilang sentemento ug mulo sa pamasin nga mahatagan kinig konsiderasyon.

Nunot niini, gipasalig ni Abaday nga andam siyang mo-endorso sa ilang hangyo ngadto ni Mayor Oscar Moreno alang sa maong katuyuan.