Hangyo sa Green Heights Subdivision giduso ngadto sa COWD

GILUWATAN dayon sa komite sa public utilities sa konseho ubos ni Konsehal Enrico Salcedo ang dinalian nga aksyon aron matubag ang hangyo sa mga residente sa Green Heights Subdivision sa Barangay Balulang nga makutayan sila sa linya sa tubig sa Cagayan de Oro Water District.

Kini human pormal  nga nangayo og tabang si Engr. Jesus Mipranum, representante sa maong subdivision, pinaagi sa paghangyo sa konseho nga magpalabang og resolusyon nga mag-endorso kanila ngadto sa COWD.

Sumala ni Mipranum nga dugay nang naghandom ang mga residente nga maserbisyohan sa COWD tungod kay barato ang singil niini ug magahom ug makaya ra sa bulsa sa mga lumulupyo sa maong dapit.

Atol sa gipahigayon nga tigom sa komite, gibutyag  ni  Engr. Edna Najeal, ang General Manager sa COWD, nga usa sa mga hagit sa pagbutang og linya sa tubig sa maong dapit ang pagka-habog sa lokasyon niini.

Gawas pa, wala pa usab silay igong pundo sa kasamtangan aron hingpit nga mapaabot ang linya sa tubig sa maong subdivision.

Apan aron dili malangan ang panginahanglanon sa katawhan, mipasalig si Najeal nga samtang nangita pa og paagi alang sa malungtarong proyekto, andam ang COWD nga mopatuman og short-term solution aron masugdan ang pag-supply og tubig ngadto sa mga residente sa dapit.

Tungod niini, hugtanong gipadayag  ni Konsehal Salcedo ang iyang suporta pinaagi sa pag-endorso sa maong short-term solution tungod kay importante kaayo ang  tubig sa inadlaw-adlaw nga kinabuhi sa matag usa, hinungdan nga angayan kining hatagan sa dinalian nga pagtagad.

Sa laing bahin, gihangyo ni Salcedo ang COWD sa pagduso sa Program of Works alang sa maong katuyoan samtang gimandoan usab ang kadagkoan  sa Green Heights Subdivision nga i-sumite usab  ang ilang approved subdivision plan kay usa pod kini sa  rekisitos  sa COWD  sa ilang gihangyo nga water connection. (JRG/SP)