Goking, stakeholders nagtigom alang sa pagpalig-on sa local meat industry

ARON masiguro ang kalig-on ug supply sa karne dinhi sa dakbayan, gihimo ni Konsehal Chris Goking, chairman sa komite sa trade ang commerce, ang usa ka tigom  bag-ohay pa lamang  aron tukion ug pangitaan sa pamaagi ang mga hagit nga giatubang karon sa industriya sa karne sa dakbayan.

Ang maong panagtigom nagpunting sa pagbalanse tali sa interes sa local hog raisers ug ang kaayohan sa mga konsumedor sa dakbayan.

Matod pa ni Goking nga importante ang pagbaton og fair market conditions diin protektado ang lokal nga produksyon apan nagpabiling barato ug accessible ang presyo sa karne sa mga merkado publiko sa syudad.

Atol sa maong panagtigom uban sa mga representante sa buhatan sa City Agriculture Productivity and Operations (APOO) gihatagan og dakong pagtagad ang sitwasyon sa local hog raisers diin nagkaubos ang presyo sa locally produced pork, samtang padayon nga nagsaka ang gasto sa feeds, raw materials, ug uban pang gikinahanglan sa mean production

Gipahugtan usab ni Goking ang panawagan alang sa mas istrikto nga pagmonitor sa presyo diha sa mga merkado ug ang pagpasalig nga sakto ug limpyo ang supply nga moabot ngadto sa mga konsumedor pinaagi sa dugang koordinasyon uban sa Cagayan de Oro City Price Coordinating Council (CPCC) aron malikayan ang kalit nga pagsaka sa retail prices diha sa kamerkadohan sa dakbayan.

"Kinahanglan kitang magtinabangay—ang kagamhanan ug ang mga stakeholders—aron masiguro nga dili maalkansi ang atong lokal producers apan magpabilin gihapon nga barato ug luwas ang karne para sa matag pamilyang Kagay-anon," sumpay ni Konsehal Goking.

Ang maong tigom gitambongan nila ni Konsehal Juancho Pascual, Edgar Cabanlas, mga representante gikan sa Department of Agriculture, Department of Trade and Industry, City Economic Enterprise and Business Development Administration, National Meat Inspection Service, NORMINHOG, ug mga meat vendors gikan sa Cogon Market. (RNQ/SP)