Goking nagpasalamat ni Janjan Tolentino, aka DIY Motovlog

“Tungod sa iyang maayong buhat ug tinud-anay nga pagpaningkamot sa pagpanglimpyo ug ginagmayng pag-ayo sa mga daplin sa karsada, sidewalk, ug dalan, nakatabang og dako sa dagan sa trapiko sa dakbayan.

Kini ang pamahayag ni Konsehal George Christopher Goking, chairman sa komite sa trade and commerce, human gitunol sa konseho atol sa sesyon niadtong Lunes nga gidumala ni Bise Mayor Bebot Rodriguez ang resolusyon nga nagpasidungog ni Janjan Tolentino, a.k.a. DIY Motovlog.  

Matod sa konsehal nga si Janjan usa ka inspirasyon alang sa tanan nga gusto maghatag ug tabang bisan sa pinakasimple nga paagi alang sa limpyo ug maayong Cagayan de Oro.

Gani, dugtong ni Goking, aduna nay pipila ang nagpasakop niini sa iyang CleanFluencer team.

Gidayeg ni Konsehal Goking ang maong team tungod sa ilang maayong panig-ingnan sa pag-alagad ug pag-atiman sa komunidad. (RNQ/SP)