Goking mipasalamat sa pagpahimutang og mga timbangan ng bayan sa kamerkadohan

SI Konsehal George Christopher Goking, chairman sa komite sa trade and commerce, mipasalamat sa mga kawani sa buhatan sa City Economic Enterprises and Business Development Administration (CEEBDA) sa pagbutang og mga timbangan ng bayan sa mga estratehikong lokasyon sa farmers market ug transportation terminal sa Bulua ning syudad.

Dako ang kalipay ni Goking kay kini nga mga timbangan libre nga magamit sa publiko aron pagsiguro nga ang matag konsumedor makakuha sa husto nga timbang  sa mga produkto nga ilang gipamalit.

Tumong sa maong lakang sa pag-ila ug pagtangtang sa mga depekto o tampered nga mga timbangan nga makadaut niadtong  nagbuhat sa patas nga patigayon ug sa gagmay’ng mamamalitay.

Gani, usa sa gihatagan prioridad karon sa konsehal ang pag-inspeksyon sa mga timbangan nga gipanggamit sulod sa kamerkadohan agig pag-aksyon   sa mga reklamo nga sagad niyang gakadawat mahitungod sa problema sa pipila ka timbangan nga giingon dili insakto ang timbang hinungdan nga gusto niyang paimbestigahan.

Niini, si Konsehal Goking mipasalamat sa maong inisyatiba kay kini nagpakita lamang  sa adunay pagpakabana sa mulo sa katawhan ug naninguha nga  mapatuman  ang transparensiya sa mga konsumidor hinungdan iyang gipaabot ang iyang hugot nga suporta sa maong buhatan diha sa paghatod sa de kalidad nga serbisyo sa katawhan. (RNQ/SP)