Esparcia misugyot og taas nga standard sa pagpahigayon sa Miss CDO

MISUGYOT si Konsehal Bernie Esparcia og taas nga standard sa pagpahigayon sa Miss Cagayan de Oro Beauty Pageant.

Kini ang reaksyon sa konsehal sa special report ni Konsehal Jay Pascual nga nagpasalamat sa mabolukon ug malinawon nga kasaulogan sa tinuig nga pista.

Si Konsehal Esparcia mibutyag nga bisan siya nakurat pud sa resulta sa gipahigayong Miss Cagayan de Oro sa miaging kapistahan sa dakbayan.

Mahinumduman nga usa si Konsehal Edgar Cabanlas nga mihatag og komentaryo kalabot sa dili maayong performance sa mga nagharana sa mga kandidata atol sa coronation night sa Miss Cagayan de Oro 2022.

Gipasabot ni Esparcia nga ang Cagayan de Oro usa ka Highly Urbanized City ug angayan lang nga taas usab ang level ug standard sa pagpahigayon sa maong pageant tungod kay daghan usab ang ga-atang ug gatan-aw niini.

Niini, nanghinaot si Esparcia nga mahatagan sa pagtagad ug matubag ang gipaabot nga reklamo ilabina kabahin kini sa mga kalihokan pahaum sa Higalaay Festival. (SP/JRGalano)