Contingency plan on drought sa agri sector aprobado sa konseho

USA sa gihingusgan sa dakbayan sa Cagayan de Oro mao ang mga lakang sa  pagpalig-on sa pagpangandam batok sa mga hagit sa kausaban sa klima (climate change) nga direktang nag-apektar sa panginabuhi sa mga mag-uuma ug mangingisda.

Kini human hiniusang giuyonan sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang resolusyon nga nagsagop ug nag-aprobar sa Contingency Plan on Drought sa Agricultural Sector sa dakbayan.

Nag-unang katuyoan niini nga masiguro ang komprehensibo nga sistema sa pagdumala ug dinalian nga pagtubag sa hulaw ug mamenusan ang grabeng kadaot niini sa sektor sa agrikultura.

Hugot nga gisuportahan ni Konsehal Paolo Gaane, chairman sa komite sa climate change adaptation and mitigation and disaster risk reduction, ang maong Contingency Plan.

Gihatagan niya og gibug-aton nga mahibal-an ang mga programa nga ipatuman sa higayon nga mahitabo ang hulaw, nga makaapekto sa agrikultura, sumpay sa kosehal.

Ang maong contingency plan gipaluyohan sa komite sa climate change adaptation and mitigation and disaster risk reduction ni Konsehal Paolo Gaane ug sa komite sa pamalaod ug reglamento ubos ni Konsehal Edgar Cabanlas. (RNQ/SP)